Hernaniko Errugbi Elkartean beti izan da jokalari beteranoen presentzia, eta «tarteka jokatu izan dituzte partiduak», aitortu dute elkartekoek. Orain dela 10 urte, gaur egun Azeri Zaharrak izenez ezaguna den taldea sortu zuten, eta horregatik, urteurren borobila ospatzeko asmoa du Hernani Club Rugby Elkarteak, herrialde ezberdinetako jokalari beteranoentzako topaketa antolatuz, larunbat honetarako. «Espazio lagunkoi berri bat eskainiko nahi izan dugu, kirolaren eta laguntasunaren balioak lehia eta ezberdintasun guztien gainetik jarriz», nabarmendu dute.
Beraz, etxeko taldearekin batera ondorengoak izango dira Landaren, etzi: Iruñako La Unica RTko Sai Zaharrak eta Iruña RC Classics, Baionako Medikoak eta Archiball Côte Basque, Donostiako Bera-Bera Gurdizaharrak eta OPLA, Oviedoko Veteranos Asturias, eta Durango RTko Sapuzaharrak. Zelaian, guztira 160 jokalaritik gora elkartzea espero dute.
Topaketa 11:00etan hasiko da, eta hainbat partidu jokatuko dituzte goizean. Arratsaldean ere izango dira partiduak, 17:00etatik aurrera. Partiduak XVeko errugbian jokatuko dira, eta erabiliko den arautegia Egorenaren (European Golden Oldies Rugby) araberakoa izango da.
Dena den, topaketak hiru egun hartuko ditu. Izan ere, bihar arratsaldeko 19:30etan, Hernaniko udaletxean harrera egingo diete kanpotik etorritakoei. Ondoren, herrigunea ezagutuko dute, eta elkarrekin poteatzeko aukera ere izango dute jokalariek, Kaxkoko elkarte gastronomikoan. Etzikoa izango da egun haundia, Landaren: «Partidu sorta amaitu ondoren, garaikurren eta oroigarrien banaketa egingo dugu. Bertan izango dira, gainera, Xabier Lertxundi alkatea eta Iñaki Rica Euskadiko Errugbi Federazioko Presidentea». Eta azkenik, topaketari amaiera emango diote igandean, sagardotegi batean bazkalduta.