Atzo goizean jokatu zen, Pasai Donibanen, Gipuzkoako Batel Txapelketa. Bertan izan ziren Hernaniko batelak, eta emaitza bikainak lortu zituzten. Infantil eta promesa mailako neskek lehenengo postua lortu zuten, eta jubenil mailako neskek hirugarrena.
Infantilen kasuan, 9 segunduko errenta lortu zuen Hernaniko batelak bigarren sailkatuarekiko. 4:58 denboran amaitu zuten estropada hernaniarrek, lan bikaina eginda. Estuago izan ziren kontuak promesa mailan; izan ere, 2 segundu atera zizkion Hernanik San Juan taldeko batelari. 7 minutu eta 36 segundu behar izan zituzten hernaniarrek lanak amaitzeko. Jubenil mailan Tolosaldea izan zen txapelduna, eta 17 segundu atzerago iritsi zen Hernaniko batela.
Emaitza bikainak Batel Ligan ere
Asteburu oparoa izan da Hernaniko Arraun Elkartearentzat. Larunbatean jokatu zen Gipuzkoako Batel Ligako azken jardunaldia, eta beste bi bandera gehitu dituzte elkarteko garaikurretara.
Kasu honetan ere infantil eta promesa mailako neskek lortu zituzten emaitza onenak. Sekulako denboraldia osatu dute, goiko postuetan mantendu dira jokatutako hamar jardunaldietan, eta bandera eskuratu dute. Gipuzkoako Txapelketan bezala, promesa mailan bereziki estu geratu da sailkapena; puntu bakarragatik lortu du Hernanik (185) Tolosaldea (184) garaitzea.
Jubenil mailako neskek hirugarren postuan amaitu dute Batel Liga, eta nagusietan, kategoria absolutuan, neskek lortu dute emaitzarik onena, bigarren postuan amaituta.