Tilos 7 Pasa pala txapelketa etzi hasiko da, guztira 73 bikoterekin, aurten ere lau maila ezberdinetan banatuta

Hernaniko pala txapelketa herrikoiena, Tilos 7 Pasa, etzi astelehenean hasiko da 73 bikoterekin, inoiz baino gehiago. Aurten ere lau kategoriatan banatuta: lehenengo maila, neskena, bigarren maila eta herrikoia.

Ohi bezala, astean zehar jokatuko dira partiduak, astelehenetik ostegunera. Lau partidu izango dira egunero, arratsaldeko 17:45etan hasita, Tilosetan. Horrela, astero 16 partidu izango dira, txapelketaren aurreneko asteetan, nahiz eta lehenengo astean astelehenetik asteazkenera jokatu. 22 tantora jokatuko dituzte partidu guztiak fase guztietan.

Ligaxka, txapelketa hasteko

Multzo ezberdinetan banatuta hasiko dute txapelketa, kategoria bakoitzean. Horrela, ligaxka jokatuko dute aurrena, astelehenetik ostegunera egunero, ekainaren hasierara arte. Multzo bakoitzeko bikoteek, denek denen kontra jokatuko dute aurreneko fase horretan.

Aurten multzo bakarra izango da lehenengo mailan, eta guztira, soilik lau bikote. Finalerdietan aurrenekoak, laugarrenaren aurka jokatuko du eta bigarrenak, hirugarrenaren aurka.

Nesketan bi multzo izango dira, zazpi bikoterekin, inoiz baino gehiago. Talde bat hiru bikotekoa izango da eta bestea laukoa. Talde bakoitzeko lehenengo biak pasako dira finalerdietara. 

Bigarren mailan ariko dira bikote gehien, 44 guztira, hamalau multzotan banatuta; hiru bikoteko hamabi talde eta lau bikoteko bi talde. Multzo bakoitzeko lehenengo bi sailkatuak eta lau hirugarren hoberenak sailkatuko dira final hamaseirenetara.

Eta txapelketa herrikoiean, azkenik, 18 bikote ariko dira, sei multzotan banatuta. Final zortzirenetara sailkatuko dira multzo bakoitzeko aurreneko biak eta hirugarren sailkatutako lau bikote onenak.

Bi edo bikote gehiago sailkapenean berdinduta dauden kasuetan, aldeko eta kontrako tantoen aldea hartuko da kontuan. Ligaxka bukatuta, ekainean hasiko dira kanporaketak: bigarren mailakoek final hamaseirenetan ekingo diote, lehenengo mailakoek eta neskek finalerdietan eta herrikoikoek final zortzirenetan. Inoiz baino partidu gehiago jokatuko dira bigarren fase horretan. Guztira, 48 partidu jokatuko dituzte bigarren fase horretan, finalen egunaren aurretik.