Trans Ikusgarritasunaren Eguna da gaur, eta manifestazioa antolatu du Hernanin Loratuz Lotu taldeak. Arratsaldeko 19:00etan jarri dute hitzordua, Aimar Elosegi Ansa 'Moio' kalean, eta bertatik abiatuko da manifestazioa. Aurretik, kedada ere antolatu dute Donostian, 18:15etan.
Loratuz Lotutik herritar guztiei helarazi diete parte hartzeko gonbidapena: «Borroka hau denona da, zurea ere bada, feminismoarena da. Denak zaudete gonbidatuta; mugimendu sozialak, herritarrak, Udala... Denen oihua behar dugu. 'Moio' kalean ikusiko dugu elkar!».
Transgeneroen Ikusgarritasunaren Nazioarteko Eguna edo Trans Ikusgarritasunaren Eguna 2009az geroztik ospatzen da, hauek munduan zehar jasaten duten bazterkeria salatzeko. AEBetako Michigango Rachel Crandall ekintzaileak sortu zuen 2009 urtean, bizirik dauden pertsona transei eskainitako ospakizun egun faltaz jabetuta, Transgeneroen Oroimenaren Egunak eraildako transgeneroak bakarrik omentzen baititu.