Hernanik eta Astigarragak jaso berri duten Zero Waste ziurtagiriaren harira, Portugalgo zenbait erakunde publikotako ordezkaritza baten bisita jaso zuten bi udaletako ordezkariek, aurreko ostegunean: «Haien herrietan Europako araudietara egokitzeko hondakin zerorako politikak jartzeko asmotan, hemen martxan dagoen sistema ezagutu nahi izan dute», azaldu zuen Hernaniko Udalak.
Hernanira egin zuten bisita aurrena, eta Xabier Lertxundik harrera egin ondoren, Mattin Aldaia Ingurumeneko zinegotziak eta Udaleko teknikariek azaldu zieten Hernaniko zabor bilketa sistema. Udaletik azaldu dute «galdera tekniko ugari» egin zituztela: «Oso bisita teknikoa izan zen, ingurumenaren eta hondakinen kudeaketaz arduratzen diren teknikariak eta ordezkari politikoek osatzen zutelako ordezkaritza». Hernanin bisita egin ondoren, Astigarragara joan ziren, bertako sistema ere gertutik ezagutzeko; eta Xabier Urdangarin alkateak egin zien harrera bertan.
Bi herrietako hondakin bilketa sistema ezagutu zuten Portugalgo 15 udal ordezkarik, hondakinak kudeatzen dituzten zenbait enpresa publikok, 174 udalerriren hondakinak kudeatzen dituen EGF entitateko kideek eta Portugalgo Ingurumen Ministerioari aholkularitza ematen dion Ecogestus enpresako ordezkariek.
Azalpenak jasotzeaz gain, hondakinak sailkatzeko erabiltzen diren moduak tokian bertan ezagutu zituzten.