Atzo jende mordoa urbildu zen Kaxko Elkarteko lokalaren inauguraziora. 12:00etan hasi ziren trikitilariak plaza girotzen, eta Kaxko Elkarteko kideek hartu zuten hitza: «28 urteren ostean, lortu dugu lokal dezente bat. Aurreko lokala txikiegia zen, eta biltzeko zailtasunak genituen, orain, aldiz, lokal eder bat daukagu. Herritarrei helarazi nahiko genieke irekia dela eta edonor izango dela ongi etorria; beraz, gerturatu lasai asko Kaxko Elkarteko lokalera, beso zabalik hartu zaituztegu eta!».
Hitzen ostean, apaizak lokala bedeinkatu zuen, eta Kaxko Elkarteko kide batek zintaren mozketa egin zuen, lokala inauguratzeko. Segidan, denak sartu ziren lokalera, bertako janaz eta edanaz gozatu eta jai giroan jarraitzera.
