Neguko denboraldi bikainari errematea jarri zion Lur Ocon Arreitunandia hernaniarrak, aurreko igandean. Izan ere, Espainiako Kros Txapelketan hartu zuen parte, Iruñean, 16 urtez azpikoetan. Euskadiko Atletismo Federazioak hautatuta, selekzioarekin aritu zen hernaniarra.
Estatu osoko 102 korrikalarik hartu zuten parte, 16 urtez azpiko mutilen proban; eta 5.000 metroko ibilbidea osatu zuten. Maila ederrean aritu zen Ocon, eta proba 18:23 denboran osatuta, 69garren bukatu zuen.
Neguko denboraldi honetan, makina bat ohorezko postu pilatu ditu atleta hernaniarrak; krosean ez ezik, baita pista estalian ere. Irungo Krosean hirugarren sailkatu zen azaroan, eta otsailean postu bera lortu zuen pista estaliko Gipuzkoako Txapelketan, 1.000 metroko proban, besteak beste.