Gaur bukatuko da epea, Hernanin esleituko diren 42 etxebizitzaren zozketan parte hartzeko, Santa Barbaran eta Floridan. Babes ofizialekoak dira horietatik 25 etxebizitza (Santa Barbaran 19 eta Floridan sei), eta tasatuak gainerako 17ak (Santa Barbaran 10 eta Floridan zazpi).
Parte hartzeko, telematikoki edo aurrez aurre aurkeztu daiteke izena emateko eskabidea, dokumentazioarekin batera: Hernaniko udaletxeko Herritarren Harrera Zerbitzuan, edo Sukia Eraikuntzak SLren bulegoetan (Lugaritz pasealekua 21, Sukia eraikina, Donostia). Zozketan, lehentasuna izango dute ohiko bizilekua Hernanin dutenek, eta azken bi urteetan etenik gabe edo azken 10 urteetan bost urtez bertan erroldatuta egon direnek. Lehentasun hurrenkeran, hurrengoak dira azken 10 urteetan Hernanin lan egin dutenek.
Informazio guztia eskuragarri dago Hernaniko Udalaren web orriko (hernani.eus) Iragarki Taulan, etxebizitza esleipenetan.