Udaberriarekin batera, iritsi da Antzerki Zikloa Biterira. Gaurtik ostegunera, antzezlan bana eskainiko dute bertan, arratsaldeko 19:30etan hasita; eta ikusmina piztu dute obra guztiek: ia sarrera guztiak daude salduta.
Sagastitarrak antzezlanarekin ekingo diote gaur, Txalo Produkzioaken eskutik. Ramon Madaula da obraren egilea, eta Begoña Bilbaok zuzendu du. Ordu eta erdiko saioan, hiru aktore izango dira taula gainean: Joseba Apaolaza, Ainhoa Etxebarria eta Koldo Olabarri. Goi-burgesiako familia da Sagastitarrena, eta ez da giro haienean, familiako alabak, Ane giza ekintzaile feministak, lehen abizena aldatzea erabaki duelako. Anton Sagasti familia buruarentzat ulertezina da hori, eta alabak bere asmoan atzera egin dezan saiatuko da.
Biharkoan, berriz, Fake, Trampantojo antzezlana eskainiko du Erre Produkzioak konpainiak, Gorka Minguezek eta David Caiñak zuzenduta, bost aktorerekin: Maribel Salas, Gorka Minguez bera, Gemma Martinez, Lorea Intxausti eta Alba Cirarda. 70 minutuko antzezlana da, gaztelaniaz; eta Urte Zahar gauean gertatzen da: gelditzen zaien bizitza osoaren lehen eguna dela ospatzen ari da familia, baina itxurakeria besterik ez da, amona benetako kanpaien aurretik ohera eramateko. Une horretatik aurrera hasiko dira arazoak...
Eta azkenik, ostegunean, Ez naiz inoiz Dublinen egon antzezlana eskainiko du Tentazioa konpainiak, ordu eta erdikoa. Markos Goikoleak egin eta Mireia Gabilondok zuzenduta, honakoak izango dira lau aktoreak: Aitziber Garmendia, Iñigo Aranburu, Mireia Gabilondo eta Iñigo Aizpitarte.
Azkeneko sarrerak salgai, bi antzezlanetarako
Osteguneko emanaldi horretarako, ordea, agortuta daude sarrerak; eta gutxi batzuk geratzen dira Sagastitarrak eta Fake, Trampantojo ikusteko. 8 euroan daude emanaldi bakoitzerako sarrerak, Biteriko leihatilan edo kultura.hernani.eus atarian.