Urte bat beteko da Zikuñagako ermita inauguratu zutenetik, eta ekitaldi bereziak prestatu dituzte urteurrena ospatzeko. Ostiral honetan, hilaren 17an, inaugurazio egunari buruzko bideo dokumentala ikusteko aukera izango da, Parrokiko aretoan. Mikel Aristregiren lana da dokumentala, eta 19:30etatik aurrera hasiko da proiekzioa.
Ondoren, ermitako itsasontzi zaharberrituaren aurkezpena egingo dute, J.M. Perona zaharberritzailearen azalpenekin. Saioa amaitzeko galderak egiteko tartea utziko dute.
Egitarauak jarraipena izango du datorren astean. Izan ere, martxoaren 25ean, larunbatean, meza eta erromeria izango dira Zikuñagako ermitan bertan. Arratsaldeko 17:00etan hasiko dira ekintzak.