Udarako traineru denboraldiari begira, beste proba bat izango du Hernaniko Arraun Elkarteak, gaur. Orion ariko da Maialen trainerua, Oriako Jaitsieran, arratsaldeko 17:30etan hasita.
Oriotik bertatik iritsi ziren primerako albisteak, aurreko asteburuan. Izan ere, Ergometroko Espainiako Txapelketan aritu zen Beñat Odriozola hernaniarra, eta txapeldun izan zen, 2.000 metroko proban (8:59), Saul Peña kantabriarraren (9:17) eta Francisco Jesus San Martin asturiarraren (9:17) aurretik.
Emaitzarekin pozik azaldu zen Xabier Zabala entrenatzailea: «Urte hasieran ez geneukan helburuen artean, hemen parte hartzea; baina Orion izango zela jakitean, erronka gisa hartu genuen. Entrenamendu batzuk aldatu genituen puntu berezi bat hartu nahian, eta ondo atera da. Txapelketa bikaina egin du, oraindik martxoan gauden arren, bere marka hiru segundutan hobetuta».