Victoria Landa Ertzaintzaren zuzendariak eta Josu Bujanda Ertzaintzaren buruak, Gipuzkoako Lurralde Burutzako eta Hernaniko Ertzain-etxeko agintariekin, agenteekin eta lankideekin batera, omenaldi hunkigarria egin zioten atzo, ostegunean, Iñaki Totorika ertzainari atentatua eta hil zuten egunetik 22 urte bete direnean. Totorikaren omenezko ekitaldia atzo arratsaldean egin zuten Hernaniko Ertzain-etxean, bere oroimenez jarritako monolitoaren eta plakaren ondoan. Bertan, lore-eskaintza eta ohorezko aurreskua egin zituzten, oroimen-ekitaldia Ertzaintzarekin batera antolatu zuten senitarteko eta ahaideak ere aurrean zirela.
Iñaki Totorika Vega Ertzaintzako agentea 2001eko martxoaren 9an hil zuen ETAk, 25 urte zituela, Euskal Poliziaren aurka eraso egiteko prestatutako tranpa batean. ETAk lehergailuak zeramatzan auto bat gurutzatu zuen Hernaniko Zinkoeneako biribilgunean, eta urrutitik leherrarazi zuen herritarren segurtasuneko agenteak hurbildu zirenean.
Konpromisoa Memoriarekin
Omenaldia Ertzaintzaren Zuzendaritza eta Burutza sustatzen ari diren hamabost omenaldietako bat da, joan den ekainaren 20an ezarri ondoren “Ertzaintzan zerbitzuan zauritutako edo hildako ertzainei aitormen, oroimen eta omenaldi ekitaldiak egiteko prozedura” arautzea.
ETAk hildako agenteei dagokienez, Ertzaintzaren aldetik ofizialki ezarri da urtero egingo direla era horretako ekitaldiak, beti biktimen familiak edo senideak kontuan izanda eta omenaldia egiteko moduari eta lekuari buruzko xehetasunei dagokienez haien desioak errespetatuz. Omenaldira joan ezin diren agenteei, Ertzaintzak euren lanpostuetan minutu bateko isilaldia egitea proposatzen die. Banako omenaldi horiek osatzen dute, Ertzaintzak ekaineko lehenengo igandean guztiak batera gogoratzeko antolatzen duen ekitaldi nagusia; egun horretan txapel gorrien eskaintza egiten da guztien izenak dituen monolitoan.
Arauketa berri honekin, ETAk hildako ertzain bakoitza banaka gogoratzeko eta ikusgai egiteko Eusko Jaurlaritzak hartutako konpromisoa betetzen da. Ertzaintzako 15 agente hil zituen ETAk 1985etik 2001era bitartean.