Ia hilabete beranduago, lehiara itzuliko dira gaur Hernaniko Euskal Ligako neskak. Arnasa hartzeko tartea izan dute azken asteetan, eta ligako aurkari gogor bat izango dute gaur aurrean: Uni Bilbao. Hernaniarrak ez daude batere bolada onean; azken bost jardunaldiak galdu dituzte, eta azken garaipena azaroaren 12an lortu zuten. Hala, zazpigarren postuan dago Hernani.
Sailkapeneko hirugarren postuan dago Uni Bilbao, baina azkenaldian ez dira nahi bezain emaitza onak lortzen ari. Azken hiru jardunalditan ezin izan dute garaipenik lortu, eta kosta egin zaie puntuak pilatzea.
Partidua Bilboko Rekalde zelaian jokatuko da, gaur, arratsaldeko 17:00etatik aurrera.
23 urtez azpikoek ere gaur jokatuko dute, Cisnerosen aurka. Liderraren etxea bisitatuko du Hernanik, orain arte ligako partidurik galdu ez duen talde bakarraren aurka lehiatzeko. Erronka zaila izango da trikoloreentzat, baina azken bi partiduetan lortutako garaipenek konfiantzaz bete dute taldea. Arratsaldeko 16:30etan hasiko da norgehiagoka, Madrilgo Universidad Complutense zelaian.