Gogortzen ari da Euskal Liga, nesketan zein mutilen, denboraldi bukaera gerturatzen ari den heinean. Oso partidu lehiatuak dira denak, eta horren erakusgarri da joan den asteburua: bi partidu gogor jokatu, eta emaitza gazi-gozoak lortu dituzte Hernaniko bi taldeek.
Urteko lehenengo porrota jaso zuen nesken taldeak, Lekeition, Marierrotaren kontra. Ondo ekin zioten hernaniarrek, eta aurreneko jokoa irabazita (20-25), bazirudien garaipena eskuratuko zutela; baina ez zuten asmatu hurrengo jokoetan, une erabakigarrietan tantoak lortzen. Horrela, 25-22, 25-19 eta 25-15 galdu zituzten hurrengo hiru jokoak.
Mutilek, aldiz, bigarren garaipena lortu zuten Gasteizen, Udapa Jatorkideren kontra. Gogotik egin behar izan zuten lan, horretarako; jokalari asko falta zituzten, gainera. Hala ere, 19-25 irabazi zuten aurreneko jokoa, eta bigarrena 25-19 galdu ondoren, 17-25 nagusitu ziren hirugarrenean. Oso parekatua izan zen laugarrena, baina etxekoek irabazi zuten azkenean (29-27), eta desenpatean jokatu zuten garaipena. Orduan, nabarmen hobeto aritu ziren hernaniarrak: 6-15 irabazi zuten, eta espero baino gehiago kosta arren, garaipena eskuratu zuten.