Partidu bakarra jokatuko da Landaren asteburu honetan. Gaur bertan jasoko du 23 urtez azpiko taldeak Alcobendasen bisita, arratsaldeko 15:30etan. Partidu lehiatua espero da, sailkapenean antzeratsu dabiltzan bi talderen artean. Zazpigarren postuan dago Hernani, jokatutako 12 partidutan 22 puntu eskuratuta. Madrildarrak, aldiz, bosgarren postuan daude, trikoloreek baino bost puntu gehiagorekin; 27.
Jokatuko duten gainontzeko taldeek etxetik kanpo egingo dute. 18 urtez azpikoek lehenengo postuan jarraitzen dute, orain arteko jardunaldi guztietan garaipena eskuratuta. Ordiziaren kontra jokatuko dute gaur, Altamiran. Bigarren sailkatua da Ordizia, eta garaipen batekin areagotu egingo litzateke orain 8 puntukoa den zuloa. 16 urtez azpikoek ere Ordiziaren aurka jokatuko dute.
TOP 14ko partidua ikusteko zozketa, martxan
Hernaniko Errugbi Elkarteak martxan jarri du Anoetan jokatuko den TOP 14 ligako partidurako sarrerak eskuratzeko zozketa. Baionaren eta Pauren arteko norgehiagoka jokatuko da martxoaren 25ean, eta rifen bitartez egingo dute bi sarreraren zozketa. Txartelak Landaren, Pineda harategian, Zintzarri tabernan eta Apeadero tabernan erosi daitezke, eta martxoaren 19an iragarriko dute irabazlearen izena.