Engruna Teatrek Univers antzezlana oholtzaratuko du, etzi, Biterin. Bi saio eskainiko ditu: aurrenekoa goizeko 11:00etan, eta bigarrena eguerdiko 12:30etan. Mireia Fernándezek zuzendutako antzezlan hau haurtxoentzako zentzumenezko esperientzia lan bat da, poesia bisuala, zuzeneko musika eta mugimendua oinarri dituena: «Nahasten, mugitzen, eta berriz ere, antolatzen diren pertsonak, objektuak. Haunditasunaren barruan, oreka eta harmonia aurkitzen dutenak. Kaosaren erdian leku eta une zehatz bat bilatzen dutenak. Kosmos honetako bizilagun bakoitza, soinu bakoitza, mugimendu bakoitza, gainerakoekiko harreman hauskorrari lotzen zaio. Univers gure zaurgarritasunarekin eta egoera berrietara egokitzeko dugun gaitasunarekin elkarbizitzeko espazioa da. Gauzarik txikienak beste guztia alda dezakeela arakatzeko lekua da», azaldu dute.
Sarrerak 3,5 euroan daude salgai dagoeneko, Biteriko leihatilan bertan edota kultura.hernani.eus webgunean.