Garaipena, bost puntu eta A multzoko txapeldun izateko aukera gertuago. Beste pauso bat eman zuen Hernanik atzo, igoera fasera sailkatu ez diren taldeen artean onena dela ziurtatzeko. 40-20 nagusitu zitzaion La Unicari, baina espero baino gehiago kostata. Trikoloreek bere nagusitasuna erakutsi zuten hainbat momentutan, bereziki partidua zaildu zitzaienean; eta ezinean aritu ziren beste zenbait unetan.
Hasi eta berehala lortu zuen aurreneko entsaioa Anartz Elosegik, Beñat Arizetak transformatu zuena; eta biek errepikatu zuten 22garren minutuan (14-3). Zigor kolpe batekin lortu zituzten ordura arteko puntu bakarrak nafarrek, baina atsedenaldira joan aurretik, beste zigor kolpe bat eta zigor entsaio bat eskuratu zituzten, aldea puntu bakarrera murriztuz (14-13).
Egoera gehiago okertu zen bigarren zatiaren hasieran, La Unicak beste zigor entsaio bat lortu (14-20) eta epaileak Beñat Arizeta 10 minutuz kaleratu zuenean. Unerik zailenean atera zuen bere maila onena Hernanik, ordea; eta jaun eta jabe izan zen azkeneko ordu erdian. Entsaio bana lortu zuten Ekaitz Arrozpidek, Iker Carbajok, Jokin Garciak eta Anartz Elosegik; eta horietatik hiru transformatu zituen Arizetak.
Azkenean, sustoak susto, beste garaipen bat lortu zuten trikoloreek, erasoko bonus eta guzti. Hiru partidu falta direnean, Hernanik ia matematikoki ziurtatua dauka txapeldun izatea.