Bi sari lortu berri ditu Iñigo Legorburu hernaniarrak maitasun gutunen lehiaketetan.
Barakaldoko XXVIII. Bihotzaren hitzak lehiaketan 'Deseraikiz' gutunarekin lortu du bigarren saria. Bertan, kriptotxanponak, prezioen gorakada, krisia eta tankerako elementuak izan ditu hizpide, gizartean txertatuta dauden balioak kritikatzeko: «Tonu jolasti bat bilatzen nuen, gizartearen balioekin kritikoa; izan ere protagonista pisu tutelatu bateko bikote bat delako. Gure gizartea ezkutatzen saiatzen den jendea, azken finean», azaldu du Legorburuk.
Lehenengo saria lortu du Bergaran, bigarren aldiz
Bergaran, aldiz, 'Urtzen' gutunarekin lortu du lehenengo saria Legorburuk. Gutuna hirugarren belaunaldiko arrantzale nigeriar euskaldun baten larrutik idatzita dago: «Nortasuna, euskalduntasuna, topikoak eta halako erreferentziekin jokatu dut».
Anje Duhaldek, Esti Markezek eta June Nogeirasek osatu dute epaimahaia.