Urbieta kalea eta Plaza Berri postuz beteta egon ziren aurreko larunbatean. Ohiko bizitasuna eta azoka giroa berreskuratu zituen Hernaniko erdiguneak.
Urbieta kalean jarri zuten bigarren eskuko azoka, eta askotariko produktuak erosi ahal izan ziren bertan. Herritar askok aprobetxatu zuten momentua gaur erakutsiko dituzten mozorroei azken ukitua emateko.
Plaza Berrin, aldiz, erroskila, barazki eta bestelako produktuen usaina gailendu zen. Kalitate bikaineko generoa iritsi zen azokara, eta jende ugari ibili zen bertan erosketak egiten.
Harrera beroaren ondoren, gustura geratu ziren azokako saltzaileak goizean zehar izandako giroarekin.