Aste berezia izango da hau, Amaia Irazustabarrena eta Ariane Arrieta palista hernaniarrentzat. Izan ere, Estatu Batuetara joango dira bihar, Los Angelesera: astebeteko egonaldia egingo dute bertan, Euskal Selekzioak deituta. Izan ere, horretarako aukera daukate joan den urtean Euskal Herriko Txapelketan elite mailan finalista izan zirenek: palako lau emakumeek, eta eskuzko lau gizonezkoek.
Bertara abiatu baino lehen, lanak eginda utzi ditu Irazustabarrenak, aurtengo txapelketan. Izan ere, bi partidu jokatu zituen aurreko astean. Asteazkenean 30-17 irabazi zuen Maider Mendizabalekin batera, Irati Ruiz de Azuaren eta Uxue Murilloren kontra, partidu ikusgarria jokatuta. Larunbatean, ordea, 29-30 galdu zuen Ruiz de Azuarekin, Leire Galdosen eta Murilloren kontra.
Garaipen garrantzitsua lortu du Hernani A taldeak ere, Euskal Herriko bigarren mailakoan, Mendi-Tenisen kontra (15-30).