Berri onak jaso ditu azken egunetan Garbiñe Etxeberria hernaniarrak. Gipuzkoako Foru Aldundiak eskaintzen duen 'Carmen Adarraga' saria jasoko du, martxoaren 3an. Aldundiak Gipuzkoako emakumeak saritzen ditu bereizketa honekin, eta futbolaren arloan egindako lanagatik sarituko dute Etxeberria.
Jokalari gisa hasi zen Etxeberria, 80. eta 90. hamarkadetan, Oiartzunen. Liga bat eta bi Erreginaren Kopa eskuratu zituen. Azken urteetan Errealeko emakumezkoen taldean aritu da buru-belarri, entrenatzaile lanetan hasieran, eta idazkari tekniko gisa orain. Lan ederra egiten ari da Etxeberria, eta horren erakusgarri dira Errealeko emakumezkoen taldeak azken urteetan eskuratu dituen lorpenak; Erreginaren kopa bat tarteko.