Lankidetza ildo berri bat ireki dute Hernaniko Errugbi Elkarteak eta Gipuzkoako Elikagaien Bankuak. 2022ko azaroan bat egin zuten bi elkarteek Radio San Sebastián sarietan, eta harreman hori izan da elkarlanean hasteko abiapuntua. HCREko Inklusibo taldeak jarri du martxan egitasmoa, eta helburu argia dute: «Alde batetik, kluba osatzen duen gizarte-masa osoak GEBk egiten duen lanaren berri izatea, eta, bestetik, laguntza-ildo bati ekitea bankuko biltegietan egiten diren boluntariotza lanetan».
Elkar ezagutzeko lehen pausuak eman dituzte bi elkarteek, eta ekintza solidario bat antolatu dute elikagaiak biltzen hasteko. Bilketa gaurtik otsailaren 11ra egingo da, arratsaldeko 17:30etatik 20:00etara, Landaren. Lehenengo ekintzari itxiera larunbatean bertan emango zaio, arratsaldeko 16:00etan, Hernaniren eta Bera Beraren artean jokatuko den derbian.
GEBk jakinarazi duenez, honako beharrak dauzka une honetan: lekale lehorrak, gailetak, kakao-hautsa, olioa, pardelak, kontserbak eta haurrentzako elikagaiak.