Hernaniko udal-talde sozialistako bozeramailea, Ricardo Crespo, kezkatuta agertu da garbiketako udal-zerbitzuen eta hondakinak biltzeko zerbitzuaren kostuak «nabarmen igo direlako». Garbitania enpresak kudeatzen ditu zerbitzu horiek, «eta kostuaren zenbatekoa haunditzen ari da, inolako zentzurik gabe. Are okerrago, hobekuntzarik nabaritu gabe».
Ricardo Crespo bozeramaile sozialistak ohar batean azaldu duenez, gastuaren igoera ez dator bat KPIaren igoerekin, ezta zerbitzuaren hobekuntzarekin ere. Ezker abertzaleko gobernu taldeek bi zerbitzu horien kudeaketa Garbitania enpresa publikoari ematea erabaki zutenetik, «kostuak gora egin du eta zerbitzuak okerrera».
Ohartarazi duenez, 2023an lehen aldiz izango da hiri-hondakinak biltzeko zerbitzua, Atez Atekoa, urtean 2 milioi eurotik gorakoa; «2017an kostua 59,49 eurokoa bazen hernaniar bakoitzeko, aurten ia 100 eurokoa izango da pertsona bakoitzeko, zehazki 98,39 eurokoa, 2023rako aurrekontuaren arabera. Kontabilitate-urtea amaitzean haunditu ere egin daiteke».
Bestalde, «kaleak garbitzeko zerbitzua EH Bilduren kudeaketa txarraren beste adibide bat da, 2018an zerbitzuak biztanleko 53,99 euro balio bazuen, 2023an 62,49 euro edo gehiago kostatuko baitzaigu, urteko kontabilitate itxieraren arabera.
Partida horren azken igoera duela gutxi gertatu da: 68.000 euro gehitu dira espaloiak garbitzeko zerbitzuak egiteko, garbiketa-makina batekin, errefortzuekin, kaleak baldekatzearekin eta abarrekin. Aurreko kudeaketarekin jada aurreikusten ziren zerbitzu horiek, baina ez zuten kostu gehigarririk. Beraz, kaleak garbitzeko zerbitzua udal-gobernu honen kudeaketa txar eta negargarriaren beste adibide bat da, okerragoa eta garestiagoa baita».
Crespok esan duenez, Garbitania, ezker abertzaleak sortutako enpresa publikoa, Atez Ateko bilketa egiten zuena, kale-garbiketan esperientziarik izan gabe, zerbitzu hau bere gain hartu zuenetik, «Hernani zikinago dago».
«Kexak jaso ditugu herritarren aldetik»
Ildo horretan, azaldu dute sozialistek hainbat kexa jaso dituztela herritarren aldetik: «gune zikinak, gainezka egindako paperontziak, belztutako espaloiak eta abar, garbiketa eta zaintza haundiagoa eskatuz. Zalantzarik gabe, egoera horren arrazoia EHBilduko gobernuak zerbitzuaren enpresa emakidadunaren gainean duen kontrol falta da».
Crespo bereziki gogorra izan da «hasieratik gaizki egon zen» garbiketa zerbitzua esleitzeko prozedura aipatzeko. Gogorarazi duenez, sozialistek «jada ohartarazi zuten Garbitaniari esleitzeak izan zitzakeen ondorioei buruz; izan ere, esperientziarik gabeko enpresa bat zen, eta EHBilduk Garbitaniarekin saltzen zuen kudeaketa zoragarri eta erdi-zuzen hura, merkeagoa eta efizienteagoa izango zena, eta hainbat enpresaren lehiaketan lizitatuz baino kontrol haundiagoa izango genuena. Azkenean, okerrago eta garestiago dela frogatzen ari da, agindutako lana egiteko beharrezko baliabiderik ez duen eta EHBilduko udal-gobernuaren kontrolik ez duen enpresa publiko batekin».