Errenteriako Touring K.E. futbol taldea mendeurrena ospatzen ari da aurten, eta Iñigo Legorburuk jarri dio letra, klubaren 100 urteak ospatzeko ereserkiari. Pasa den ostiralean eman zuen Errenteriako taldeak, 2023 urtean egingo dituen ospakizunen berri, Real Sociedad edo Gipuzkoako futbol federazioko ordezkariak ere han zirela.
Legorbururen hitzetan, «direktibakoek lurrari lotutako ereserki bat nahi zuten, futbolariak zelaira irteten diren unean entzun eta motibatu daitezen partiduari ekiteko». Eta hala, hainbat aukera pentsatu eta aztertu ondoren, «inguruneari, koloreei eta batez ere herritartasunaren balioei erreferentzia egitea erabaki genuen; jendea batzen duten gauzak, azken finean».
Melodia Aitor Mitxelenak konposatu du, Errenteriako Musika Bandak jarri dio musika, eta ahotsa Andra Mari Abesbatzak. Errenteriako Lekuona Fabrikan estreinatu zuten ereserkia, joan den ostiralean; eta lehen unetik arrakasta izan duela dirudi: «batzuk negar-malkotan etorri ziren hunkituta eskerrak ematera», kontatu du Legorburuk.
Ereserkia: 'Touring, bihotz gorri eta urdin'
Gorriaren indarraz eginda aurrera
zeruaren urdinez hura ukitzera
neska-mutilen lanaz harro sentitzera
Gora Touring! Oihuka, guztiok batera.
Langileon herria da Errenteria
lanabesak Lartzabal eta Fanderia
mendeetako ikur: lana, izerdia
taldetik haragoko, gu garen sendia!
Urdabururen xarma Oiartzun ibaian
sendotasun bihurri bat gure paisaian
balioak sustatuz lehiaren garaian
bizipoza nagusi den joko-zelaian
Langileon herria da Errenteria
lanabesak Lartzabal eta Fanderia
mendeetako ikur: lana, izerdia
taldetik haragoko, gu garen sendia!
Gora Touring! Ozen bat gure aldarria
itsaso izan ginen haien egarria
historiako xendan denok ekarria
herriak taldea ta taldeak herria!