Datorren larunbatean aterako da kalera Kaldereroen konpartsa, Elur Txori elkartetik. Gaueko 21:00etan abiatuko dira zartagi, lapiko eta mailuak eskuetan hartuta, herriko kaleak eta plazak ohiko doinuekin alaitzera. Aurretik, urtero bezala, afaria egingo dute Elur Txorin bertan, 19:30etan. Joan den ostiralean jarri zuten afarirako apuntatzeko zerrenda, elkartean.
Egun haundiaren aurretik, gainera, hiru entsaio egingo dituzte Kaldereroek, aste honetan. Bihar izango da aurrenekoa, arratsaldeko 20:00etan hasita, Elur Txorin. Asteazkenean eta ostegunean egingo dituzte beste biak, ordu eta toki berean.