Bigarrenez ospatuko dute Buruntzaldeako Independentzia Eguna, Hernanin, larunbat honetan. Egun osorako egitaraua prestatu dute Buruntzaldeako Ernaik, Sortuk eta LAB sindikatuak, eta herritar guztiei luzatu diete parte hartzeko deia.
Goizeko 11:00etan hasiko dute eguna, Biterin, hitzaldi batekin: Burujabetzak mugarri, independentziara bidea. Ondoren, herri bazkaria egingo dute Atsegindegin, eta Mexikortxo taldearen emanaldia izango da bazkalostean. Arratsaldean manifestazioa egingo dute, 18:00etan Plazatik abiatuta, Bidea igarriz, independentziarantz! lelopean. Eta azkenik, musikak hartuko du protagonismoa gauean: Pleura eta Arkada Social taldeek joko dute Atsegindegin, 20:30etan hasita; eta DJ Atxuak RaZin disko jartzaileak ondoren, Garin tabernan.
Bazkarirako eta gaueko kontzertuetarako txartelak salgai daude Garinen: 15 euro dira bazkaria, eta Independentzia Eguneko kamixeta ere emango dute horrekin; eta 12 euro Pleura eta Arkada Social taldeen kontzertuak. Buruntzaldeako gainerako Herriko Tabernetan ere eskuratu daitezke txartelak.