Datorren ostegunean, hilaren 26an, Hernanin aurkeztuko du Petare liburua, Leire Ibarguren egileak. Arratsaldeko 18:00etan izango da, Kulturarteko Plaza Feministan; eta idazle azpeitiarrak bertan azalduko ditu liburuaren nondik norakoak.
Miren Egigurenen bizitza kontatzen du liburuak; 47 urtez Venezuelan bizi izan den bidaniarraren istorioa. Irakaslea da formazioz eta lanbidez, baina misiolari lanetan aritu da urte hauetan, Caracas hiriburuko auzo pobreenean: Petaren. Ekintzailetasuna da Egigurenen ezaugarri nagusietako bat, eta lanean aritu da «herritarren bizi baldintzak hobetzeko proiektu komunitarioak hauspotzen eta egikaritzen».
Hori horrela, Egigurenen bizipen eta ekintzak liburu batean jaso ditu Ibargurenek: «Zapata kaxa zahar batean gordeta dauzka zuri-beltzezko argazkiak, egunkari zati horituak, DVDak, koloretako argazkiak». Bizitza oso bat kabitzen da Miren Egigurenen zapata kaxa horretan, eta puska horietatik abiatuta kontatu dio bere bizitza idazleari.