Hilabetetako lanaren ondoren, asteazkenean aurkeztu zuten, Biteri Kultur Etxean, 'Arrailak' abestiaren bideoklip animatua. Bertan izan ziren bideokliparen sorkuntzan parte hartu duten artistak, eta proiektuaren nondik norakoak azaldu zituzten. Maite Larbururena da abestia, Ainara Azpiazu 'Axpi' izan da marrazkigilea, eta Oskarbi Sein arduratu da animazioa sortzeaz. Hiru egileek hitz egin zuten hilabete hauetako bizipenei buruz, eta sukaldeko lanetan gertatutako pasadizoak kontatu zituzten.
Egindako lanarekin oso gustura agertu ziren hiru sortzaileak, eta herritar ugari bertaratu ziren Biteriko aretora, bideoklipa estreinakoz ikustera.