Etenaldi labur bat egin, eta indartsu bueltatuko da erremontea, Galarretara: jaialdi erakargarria prestatu dute gaurko, urteari hasiera emateko. Bi partiduk sortuko dute ikusmina bereziki, 15:30etan hasita. Batetik, Buruz Buruko Masterrari ekingo diote, eta Josetxo Ezkurrak eta Xabier Azpirozek jokatuko dute txapelketako lehenengo kanporaketa, semifinaletako ligaxkara sailkatzeko.
Eta bestetik, jaialdiko estelarrak erakarriko ditu ikusle asko, kantxara bueltatuko baita Javier Urriza. Iruindarrak irailaren 10ean jokatu zuen azkenekoz, Buruz Buruko Txapelketaren finalean: txapela buruan bai, baina min hartuta bukatu zuen, eta ordutik jokatu ezinik aritu da. Gaurkoa izango du itzulerako partidua, eta ez nolanahikoa: Iban Larrañagarekin ariko da, Beñat Segurolaren eta Endika Barrenetxearen kontra. Binakakoa irabazi berri dute Segurolak eta Larrañagak elkarrekin, eta finalista izan zen Barrenetxea ere. Goi-mailako itzulera izango du, beraz, Buruz Buruko txapela zortzi aldiz jantzi duenak.