Ez zeukaten partidu xamurra, Euskal Ligako bi talde hernaniarrek, urtea hasteko. Eta asteburu gogorra izan dute, porrot bana jasota: neskek 0-3 galdu zuten etxean, Udapa Jatorkideren kontra; eta mutilek 3-2 Berriozarren, Navarvoleyren kontra.
Bigarren sailkatua hartu zuen Hernanik kiroldegian, nesken Euskal Ligan. Ez zioten partiduari ondo ekin hernaniarrek, eta 11-25 galdu zuten aurreneko jokoa. Berdinduagoak izan ziren hurrengo biak, baina azkeneko puntuetan, bisitariek lortu zuten abantaila, eta 20-25 eta 22-25 nagusitu ziren, garaipena eskuratzeko.
Bestelakoa izan zen mutilen Euskal Ligako partidua, Berriozarren. Erronka zaila zeukan Hernanik, liderraren kantxan; baina ezin hobeto erantzun zion, eta oso gertu izan zuen garaipena. 25-18 nagusitu zen Navarvoley aurreneko jokoan, Hernanik berdindu bigarrenean (19-25), berriro aurrea hartu liderrak (25-12), eta beste behin berdinketa laugarrenean (21-25). Horrela, desenpatean jokatu zuten garaipena, eta etxeko taldea nagusitu zen (15-10).