Txinparta eta grazia bereziarekin hasi dute aurtengo txotx denboraldia, Itxas-Buru sagardotegian. Ehun lagunetik gora bildu ziren ostiral iluntzean, Aitor Mendiluzeren eta Agin Labururen bertsoak entzutera. Afaldu aurretik egin zuten lehenengo saioa, kupel artean, eta afal ondorenean errematatu zuten lehendik hasitakoa.
Ez zen isilune luzerik egon gau osoan; gogotik jardun zuten bi bertsolariek, eta saio bizia sortu zuten, erritmo haundikoa. Bertaratutako jendeak gustura aditu zituen bertsolarien txantxak, zirtoak eta pasadizoak, afaldu aurretik, bitartean eta ondoren.
Tabernetako Txapelketaren txanda, San Sebastian bezperan
Bertsolaritzaz gozatzen jarraitzeko aukera izango da datozen egunetan, Hernanin. Ohiko eguna berreskuratuta, ostegunean jokatuko da Tabernetako Txapelketa, Garin tabernan. Festa giroa izango da gaueko 22:00etatik aurrera, eta gauerdian jakingo da nor izango den aurtengo txapelduna.