Punta-puntako bertsolariekin agurtuko dute aurtengo Bertso-Lata. Maialen Lujanbio, Aitor Mendiluze, Amets Arzallus eta Saioa Alkaizak kantatuko dute gaur, 18:30etatik aurrera, Biteri Kultur Etxean. Bertso saiorako sarrerak bertan egongo dira eskuragarri, 17:00etatik aurrera, eta 7 euro balioko dute.
Hau izango da Bertso-Latako azken ekitaldia. Guztira sei saio ezberdin antolatu zituen Paulo Txikiya Bertso Eskolak, herriko beste zenbait elkarterekin elkarlanean, eta arrakastatsuak izan dira. Haurrei zuzendutako saioak, herriko bertsolarien saioak eta bestelako ekitaldi bereziak tartekatu dituzte aurtengoan.
Tabernetako Txapelketak mantenduko du bertso giroa
Bertso-Lata bukatu arren, bertsolaritzaz gozatzeko aukera izango da Hernanin. Ohiko eguna berreskuratuko du Tabernetako Txapelketak. San Sebastian egunaren bezperan jokatuko da, eta herriko bertsolariak garaiz daude izena eman eta kantura animatzeko. Giro ederra sortu ohi da Garin Tabernan, eta aurten, pandemiaren eragin guztiak atzean utzita, lehengo giroa berreskuratzeko ilusioa dute antolatzaileek.