Protagonismo haundia izan zuen Hernanik, beste behin, Bertsolari Txapelketa Nagusiaren finalean, abenduaren 18an Iruñeko Nafarroa Arenan: txapela jantzi zuen Maialen Lujanbio hernaniarrak hirugarrenez, eta bertan aritu ziren baita ere Aitor Mendiluze eta Beñat Gaztelumendi, Hernaniko Bertso Eskolako kideak; eta Nerea Ibarzabal, Hernanin bizi den markina-xemeindarra.
Hori horrela, omenaldia egingo die Hernaniko Udalak lauei, gaur arratsaldean. Ekitaldi irekia prestatu du, 19:00etan hasita Plazan; eta herritar guztiei luzatu die bertaratzeko gonbitea.
Bertan, aitortza egingo diete txapelketan parte hartu duten Bertso Eskolako gainerako kideei ere. Haien ordezkari gisa egongo da Oier Iurramendi, txapelketako koordinatzailea.