Ohitura den bezala, korrika bukatuko dute urtea, makina bat hernaniarrek. Izan ere, Wukroren aldeko San Silbestrea egingo dute Hernaniko kaleetan, abenduaren 31n, arratsaldeko 17:30etan Plazatik abiatuta. 4 kilometroko ibilbidea izango du probak, eta zabalik dago izenematea: rockthesport.com plataforman egin behar da, eta 10 euro dira.
Lasterketa nagusiaren aurretik, haurren lasterketak ere izango dira, Plazan bertan: 8 urtetik beherakoena 16:50etan, eta 9-11 urtekoena 17:00etan.
Gaizka Izagirre bigarren, Oianguko Krosean
Aurreko asteburuan, bestalde, Oianguko Krosean hartu zuten parte CD Hernaniko 21 atletak, kategoria ezberdinetan, Ordizian. Eta horietatik, bi hernaniarrek lortu zuten podiumera igotzea: Gaizka Izagirre bigarren izan zen 20 urtez azpikoetan, eta Oier Arruti hirugarren 16 urtez azpikoetan.