Aurreko urtean bezala, eta Hernaniko Errugbi Taldearen ekimen bati esker, jostailuen doako azoka txiki bat antolatu du aurten ere Amherrrek, Andre Kale 3 zenbakian. Egun hauetan egongo da zabalik: etzi larunbatean, igandean, abenduaren 17an eta abenduaren 18an.
Larunbatetan, goizez eta arratsaldez egongo da zabalik (10:30etatik 13:00etara eta 16:30etatik 19:00etara); igande eta jaiegunetan, goizez bakarrik egongo da irekita (10:30etatik 13:00etara).
Gehiegizko kontsumoaren egun hauetan, baliabideak berrerabiltzearen aldeko apustua egiten dute Amherretik, baita opariak jasotzeko eta emateko orduan aukera-berdintasunaren aldekoa ere. «Horrekin lortu nahi dugu urteko sasoi honetan denek izatea arropa edo jostailuak, eta, aldi berean, baliabideen erabilera sustatzen dugu».
Urtean zehar asteazkenetan 17:00etatik 18:30etara, normalean, herritarren eskutik jasotako arropa eta mantak jaso eta entregatzeko biltegia irekita izaten dute. Logistika-kontuengatik, urtean zehar arropa ematea eta jasotzea baino ezin dute kudeatu. Era berean, ordutegi horretan bertaratu ezin diren pertsonek Amherren telefonoetara (667 710 928 / 650 294 390 / 671 116 414) dei dezakete beste ordu bat koordinatzeko.