Lanpetuta pasa dute asteburua, Hernaniko boleibol taldeek; bereziki, Euskal Ligako neskek. Bi partidu jokatu zituzten igandean, eta garaipen eta porrot bana lortu zuten: goizean Deusto menderatu zuten etxean (3-1), eta arratsaldean galdu egin zuten Getxoren kantxan (3-0).
Bi zati desberdin izan zituen goizeko partiduak. Aurreneko bi jokoetan, erraz nagusitu zen Hernani (25-7 eta 25-12), eta bideratuta utzi zuen partidua. Baina ondoren, joko-sistema aldatu, hirugarren jokoa 22-25 galdu, eta urduritu egin ziren. Hala ere, lortu zuten laugarrena irabazi (25-22) eta garaipena ziurtatzea.
Bestelakoa izan zen arratsaldeko partidua: liderra zeukaten aurrean, etxetik kanpo, eta goizean pilatutako nekearekin. 3-0 galdu zuen Hernanik, baina markagailuak erakusten duena baino lehiatuagoa izan zen partidua: 25-13, 25-22 eta 25-23 galdu zuten, liderrari aurre eginda.
Ez zeukaten partidu erraza Euskal Ligako mutilek ere, larunbatean Gasteizen, Jatorkideren kontra. Oso lehiatua izan zen aurreneko jokoa, baina 26-24 nagusitu ziren arabarrak azkenean, eta horrek desorekatu zuen balantza. Joko hori galtzeak kalterako eragin zien hernaniar gazteei, eta ezin izan zuten maila hori erakutsi hurrengo bi jokoetan: 25-17 eta 25-11 galdu zuten, eta Jatorkiderentzat izan zen garaipena (3-0).