«Prentsaren bidez jakin dugu ekitaldi horren berri» adierazi du PSE-EEk

«Oso atsekabetuta eta triste gaude, berdintasunaren alde talde bakar batek lan egiten duela erakutsi nahi dutela ematen baitu»

Hernaniko alderdi sozialistak kritikatu du, udal gobernuak ez diela  gonbidapenik egin, Akarregi industrialdean dagoen industriako langileen omenezko ibilbidearen inaugurazioan parte hartzeko, eta Ricardo Crespok gehitu du egoera «ulergaitza» dela.

PSE-EEk nabarmendu du atsekabetuta eta triste daudela: «industrian lan egiten zuten emakumeak sentsibilitate politiko desberdineko kolektibo askotarikoak direlako, non alderdi eta sindikatu kide askok, amonek, ahizpen eta alabek industrian lan egin duten. Are gehiago, zinegotzi sozialistaren senideak industriako langileak izan dira eta, beraz, kolektibo hori gizartean dagoen aniztasun horren isla da». 

Era berean, alderdi sozialistak dio ekitaldi hau aukera bat izan zitekeela Hernanin hain gai sentikorrean dagoen batasuna agerian jartzeko: «Hala ere, 2021eko ekaineko osoko bilkuran lortutako akordioa sinbolizatzen zuen ekitaldi bat, udal talde guztien babesarekin, industria-arloko emakume langileen paseoa industria-gunearen erriberako pasealekuan jartzea aho batez onartu ondoren, zatiketaren eta kritikaren sinbolo bihurtu da, kale-izendegiaren feminizazioa sustatzea zuen benetako helburua erabat baztertuta utziz». 

Jarraian, Crespok honakoa azpimarratu nahi izan du: «Gure berdintasun ereduan sentsibilitate guztiak sartzen dira, eta beraienean badirudi ez garela denok sartzen. Berdintasuna aldarrikatzeko modurik txarrena gainerako alderdi politikoak baztertzen saiatzea da. Berdintasunari mesede txikia egiten dion sektarismo-modu bat da». 

PSE-EEk argi adierazi du beti luzatu dutela eskua eta laguntzeko prest egon direla: «ideiekin eta ekimenekin lagunduz. Hernaniko kale izendegia aldatzea erabaki zenean, emakumeen presentzia zabalagoa izan zedin, sozialistek 27 proposamen baino gehiago egin genituen. Andre Kale izena aldatu zenean, babesa eman genion; Carmen Adarraga izena eman zitzaionean atletismo pistatik gertu zegoen haur parkeari, Gipuzkoako Foru Aldundiko kirol-zuzendari Goizane Álvarez sozialistarekin batera, erabakia babestu genuen; Azaroak 25 plazaren izena aldatu zenean, parte hartu genuen; “Moio”; “Ibarrolaburu-Lorenza”... Beti kolaboratu izan dugu. Baina gertatzen dena da orain prentsaren bidez jakin dugula ekitaldi horren berri eta asko tristetzen gaitu, udaleko gainerako talde politikoen presentzia saihestu nahi izan dela dirudielako eta hori etsigarria da». 

Amaitzeko, Crespok EH Bilduko udal gobernuaren jokabidea okerra dela adierazi du: «gainerako talde politikoek berdintasun politiketan lan egin dutela, lan egiten dutela eta lan egingo dutela jakin beharko luketelako. Gainera, sentsibilitate politiko guztiei interesatzen zaigun gaia da, eta erakutsi dugu denok prest gaudela taldean lan egiteko, errentagarritasun politikorik bilatu gabe, ikuspegi zabalarekin. Berdintasunaren alde emakume sozialista askoren borroka aldarrikatu nahi dugu. Lehenik nahiak izan ziren eta, azkenean, gure herriaren demokrazia sendotu duen legeriaren parte izan ziren. Are gehiago, gogora ekarri du Bigarren
Errepublikako zenbait parlamentari sozialistaren botoak erabakigarriak izan zirela Espainian 1931ko Konstituzioan emakumeen boto eskubidea aitortzeko, eta, lehen aldiz, 1933ko azaroko hauteskunde orokorretan erabili ahal izan zutela». 

Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!