Ezin izan zuen hirugarren garaipena lortu segidan, Hernanik, nesken Euskal Ligan. Trikoloreek derbia jokatu zuten larunbatean, Landaren, Bera Beraren kontra; eta ezin emaitza estuagoarekin galdu zuten (6-7). Oso puntu gutxiko partidua izan zen, eta defentsa nagusitu zitzaion erasoari. Urez eta lokatzez betetako zelaiak ere ez zuen lagundu jokaldiak borobiltzen.
Hernanik hartu zuen aurrea, 17garren minutuan, Enara Arrutiren zigor kolpe batekin (3-0); eta beste zigor kolpe bat lortu zuen Arrutik berak, 56garrenean (6-0). Baina donostiarrek lortu zuten partiduko entsaio bakarra, 66garrenean; eta transformazioa lortuta, hori nahikoa izan zuten garaipena eskuratzeko.