Euskal komikigintzaren hiriburu bilakatu da Hernani, aurreko bi egunetan: estreinako aldiz jarri dute Hernanikomik azoka, eta makina bat herritar gerturatu dira, atzo bereziki, komikiz betetako postuetara. Komikizaleak asko, eta unibertso horretara hurbiltzeko asmoa zutenak, beste asko. Horixe baitzen helburua, euskal komikiak ezagutarazi eta herritarrengana gerturatzea
Une berezi asko izan ditu Hernanikomik azokak, bi egunez; eta horietako bat, berezienetakoa, atzo eguerdian izan zen: Joseph Camino saria jaso zuen Jon Zabaleta ilustratzaile hernaniarrak, hunkituta, bere ibilbide luze eta oparoari omenaldi gisa.
Zabaletak aitortu zuen, ez zuela halako omenaldirik espero Hernanin, eta gogora ekarri zuen, nola hasi zen marrazkigintzan: «Plazan, mezetara etortzen nintzenean, postua jartzen zuten, tebeoekin. Mundua zegoen horietan, eta barruraino sartu zitzaidan harra. Eta noski, barruko hori ateratzeko, marrazten hasi nintzen; horixe egin behar baita sendatzeko, marraztu. Ordutik, gaur arte».
