Etxebizitzaren arazoari buruz, kanpaina jarri zuen martxan Buruntzaldeako Gazte Koordinadora Sozialistak, aurreko astean. Eta horren baitan, asanblada irekia antolatu du etzirako, Hernanin: arratsaldeko 18:30etan izango da, Biteri kultur etxean.
Bertan, Hernaniko etxebizitzaren arazoa landuko dute: «Gure herrian alokairu bat lortzea ezinezko bihurtu da, eta zer esanik ez etxebizitza bat. GKStik, arazo hori identifikatu eta borrokatzeko beharra ikusi dugu, eta hortik abiatuta aurkeztu dugu kanpaina». Izan ere, nabarmendu dute «kapitalismoaren krisialdi betean» gaudela: «Gazte langileon bizi eredua pobretzen ari da, eta oinarrizko bitartekoak eskuratzea gero eta zailagoa da. Langile klasearentzat gero eta zailagoa da etxebizitza egonkor bat lortzea, gure bizi eta lan baldintzak okerrera eta oinarrizko bizi bitartekoen prezioak gora baitijoaz».