Larunbatean jokatu zen Donostiako Nazioarteko Krosa, Lasarte-Oriako hipodromoan; eta Euskadiko Kros Txapelketa ere jokoan zegoen. Bertan izan ziren hainbat atleta hernaniar, eta sekulako emaitzak lortu zituzten. Bereziki nabarmentzekoa, Anartz Artolak lortu zuena: Euskadiko txapeldun izan zen, 23 urtez azpikoetan. Kategoria absolutuko lasterketan hartu zuen parte Artolak, oso maila haundiko korrikalariekin; eta 24garren sailkatu zen, 110 partehartzaileren artean, 28:19 denboran osatuta 8,85 kilometroko ibilbidea. Horrela, Euskadiko Txapelketa absolutuan bosgarren izan zen, eta 23 urtez azpikoetan onena, Ibai Larrearen (28:23) eta Jon Bazen (29:21) aurretik.
Master mailan aritu ziren beste bi hernaniar, Sergio Roman eta Xabier Barberena; eta podiumera igo zen Roman ere, bigarren postuan bukatu baitzuen lasterketa, Iraitz Senar irabazlearen denbora berean (8:06). Barberena 19garren izan zen, 10:14 denborarekin.
Eta izan zen beste hernaniar bat ere, podiumera igota: hirugarren sailkatu zen Oier Arruti, 16 urtez azpikoetan. 4:37 denboran osatu zuen proba, Txindoki taldeko Urko Etxebesteren (4:30) eta Haitz Urrestarazuren (4:31) atzetik. Kategoria berean, Lur Oconek ere proba ederra osatu zuen, eta 17garren iritsi zen helmugara (5:01). Azkenik, 20 urtez azpikoetan aritu zen Gaizka Izagirre, eta 12garren izan zen, 9:23 denborarekin.
Asfaltoko lasterketei dagokienez, berriz, atseden hartu dute bailarako korrikalari gehienek, baina Ikaztegieta Krosean aritu zen Alexander Iturralde hernaniarra: 22garren izan zen, 37:47 denboran osatuta 10 kilometroko ibilbidea.
Datorren asteburuan Behobia-Donostia lasterketa... eta Atenasko Maratoia
Datorren igandean izango dute hitzordu seinalatua korrikalariek, Behobia-Donostia lasterketarekin. Urumea bailarako ehunka korrikalari izango dira partehartzaileen artean, urtero bezala. Baina hemendik urruti ere, lasterketa berezia izango du hernaniar batek: Atenasko Maratoian hartuko du parte Fermin Tolosak, eta hori izango omen du bere azkeneko maratoia. Etxekoak ondoan izango ditu, animoak ematen.