Mendi duatloietan protagonista izaten jarraitzen dute hernaniarrek, errelebo probetan bereziki. Eta oraingoan, Xabat Alonsoren txanda izan da: hirugarren izan zen Aiako mendi duatloian, Aitor Agirre zumaiarrarekin bikotea osatuta.
Korrikako bi sektoreak osatu zituen Alonsok: lau kilometro pasatxo aurrena, 21:22 denboran; eta beste bi kilometro inguru bukaeran, 10:31 denboran. Tartean, 19 kilometro inguru egin zituen Agirrek bizikletan, 1:10:41 denboran. Horrela, guztira 1:42:34 behar izan zuten ibilbidea osatzeko. Aurretik helmugaratu ziren Aiako bi bikote: Ibai Makazaga eta Eneko Gonzalez (1:36:21), eta Mikel Usandizaga eta Haritz Erasun (1:37:58).
Beste bi hernaniar ere izan ziren partehartzaileen artean, errelebo proban: elkarrekin aritu ziren Gorka Lopez de Arregi eta Iñaki Etxenike. Etxenikek osatu zituen korrikako bi sektoreak (25:46 eta 12:19 egin zuen, hurrenez hurren), eta Lopez de Arregi ibili zen bizikleta gainean (1:39:07). 23garren postuan bukatu zuten, 2:17:12 denborarekin.
Euskal Herriko Mendi Duatloien Zirkuituko proba izan zen Aiakoa, aurrekoak bezalaxe. Eta asteburu honetan, beste hitzordu bat izango du zirkuituak: Kanpezun jokatuko da mendi duatloia, bakarka zein erreleboka, gaur arratsaldeko 14:00etan. Beste bi proba geratzen dira, aurtengo zirkuitua bukatzeko: azaroaren 12an Iruritan, eta hilaren 26an Igartzan (Beasain).