Bi egunez ospatu dituzte Txantxillako Jaiak, Hernaniko auzoetako azkenekoak, aurtengoz. Eta beste behin, gaztetxoenak izan ziren protagonista nagusiak, beraiek aritu baitziren ekintza gehienetan saltsa jartzen. Atzo, festen egun nagusian, goizeko lasterketa, jolas eta ginkanatik hasi, eta iluntzeko Arimen kalejirara arte aritu ziren batetik bestera, batere nekatu eta aspertu gabe. Eguraldia lagun, giro ederra izan zen auzoan, egun osoan zehar, hiru urteko etenaldiak animoak itzali ez dituela erakutsiz.