Errebeldeak Fest jaialdiak herriko makina bat txoko hartu zituen joan den larunbatean. Espainiar Estatuko lehenengo kirol eta rock inklusiboko topaketa izan zen, eta arrakasta izan zuen antolatutako egitarauak. Hain justu, antolatzaileek aurreratu zutenez, helburu nagusia zen «herritarrak eta, bereziki, aniztasun funtzionala duten pertsonak kirol-jarduera egokituez eta inklusiboez betetako jardunaldi dibertigarrian parte hartzea». Eta borobil bete zen esandakoa, herritar mordoa animatu baitzen jaialdian parte hartzera.
«Hernanin beti dago eskaintza zabala aisialdirako, eta jakin bagenekien zaila izango zela txoko guztiak betetzea. Hala ere, jendea hurbildu zen gugana, eta oso pozik gaude lortutakoarekin», aipatu du antolakuntza taldeko Ibón Casasek. «Gelditzeko etorri gara. Udalarekin hitz egingo dugu datorren urtean bigarren edizioa egiteko. Izan ere, nahi duguna da Hernani erreferente izatea irisgarritasunean eta inklusioan, aniztasun funtzionala normalizatzea, aniztasun funtzionala duten eta ez duten herritarrek parte hartzeko jaialdia sortzea, eta guztiek ondo pasatzea», zehaztu du Casasek.