Denboraldiko bigarren jardunaldia izan zuen Hernanik, joan den igandean. Etxetik kanpo jokatu zuten trikoloreek, Oviedoren aurka, El Naranco zelaian. Norgehiagoka zaila izan arren, hernaniarrak gailendu ziren Asturiasen, 17-26ko emaitza lortuta. Horrela, bitik bi garaipen batu dituzte sailkapenera.
Hasieran, Hernani aurreratu zen markagailuan. Beñat Arizeta hernaniarraren entsaioarekin eta jaurtiketarekin, 0-7koa lortu zuen Hernanik. Eta berehala heldu zen Jokin Garciaren entsaioa, 0-12koa eginda.
Azken emaitza horrekin heldu zen atsedenaldia, eta indartsu itzuli ziren trikoloreak. Beñat Arizetaren zigor kolpearekin, 0-15 egin zuen aurrera Hernanik. Gero, Oviedok lortu zuen hiru puntu batzea (3-15), zigor kolpe baten ondoren. Baina hernaniarrek ez zuten etsi, eta Arizetaren beste zigor kolpe batekin, 3-18 jarraitu zuten aurrera. Eta, hortik aurrera, geldiezin aritu ziren hernaniarrak. Jokaldi bizi baten ostean, Oier Garmendiak entsaioa egin eta 10-25eko markagailua egin zuten. Azkenean, 17-26 itxi zen norgehiagoka, trikoloreen alde. Partidua amaituta, lehia gogorra izan zela aitortu zuten Hernanikoek: «Gure jokoa moldatu behar izan dugu garaipena lortzeko», adierazi zuen Arizetak HCRE-ko sare sozialetan.
Hurrengoa, etxean
Hirugarren jardunaldiko partidua etxean jokatuko dute hernaniarrek, asteburu honetan. Ordua eta eguna zehazteke badaude ere, Mungiako Uribealdea izango dute aurrez aurre.