Duela hilabete hasi zuen Hernaniko Musika Bandak denboraldi berria, Euskal Jaietan kontzertua eskainiz. Oraingo honetan, ordea, hostoen erortzea aitzakia hartuta, udazkeneko kontzertua eskainiko du gaurkoan, udaletxeko arkupeetan, arratsaldeko 19:00etan hasita.
Roberto Pacheco izango da Udazkeneko kontzertuko zuzendaria, eta bere gidaritzapean kolore eta erritmo ezberdineko errepertorioa eskainiko du publikoaren gozamenerako. Gaurko kontzertuan, nagusi izango dira abesti latinoak, «ikuskizun bizi eta alaia eskainiz», Pesares edo Fandagueria bezalako abestietan nabarmendu ahal izango den bezala. Udazken kontzertuaren ondoren, azaro amaieran eskainiko duten Santa Zeziliaren kontzertua prestatzen hasiko direla ziurtatu du Bandak.