Gaurtik bihar arte, Zelabideko auzotarrek, ez dute aspertzeko tarterik izango, festak hasten baitira gaur, eta sekulako egitaraua prestatu dute. Gaur arratsaldeko txupinak iragarriko ditu auzoko jaiak, eta Holi festarekin kolorez beteko dute, Gabriel Zelaia plaza. Jarraian, Jaixkipe txarangak eta buru haundiek hartuko dute lekukoa. Sardina dastatzeko aukera ere izango dute auzotarrek eta jarraian, etxeko txikiek gorputzak mugimenduan jartzeko, DJ Pakok musika jarriko du.
21:00ak aldera, auzotarrak elkartuko dira, ogitartekoak jateko elkarrekin, eta noski festan jarraitzeko indarrak hartzeko. Gaueko 23:00etan, helduentzako dantzaldiak hartuko du nagusitasuna, eta DJ Pakok jarriko du berriro, musika. Gaueko 23:30etan, berriz, zezen suzkoak argituko du auzoa, egunari amaiera emateko.
Bihar, egun potoloa
Bihar, goizetik esnatuko da auzoa, dianaren musikarekin. Jarraian, 10:30ak aldera, Denontzat taldeak antolatuta, haurrek ederki pasako dute atletismo pista alboan jarriko diren oztopo probekin. Txikiez gain, helduek ere izango dute kirola egiteko aukera, izan ere, sokatira herrikoia antolatu da, 11:00etarako, Eper tabernako plazan.
Eguerdian, patata tortila lehiaketa ere antolatu dute goizerako, eta 12:00etan aparrez estaliko da Gabriel Zelaia plaza. Jarraian ez dira faltako, sagardo dastaketa, paella herrikoia, gaztelu puzgarriak, toka txapelketa, mus txapelketa, giza futbolina, txokolatada, jaien aldeko bingoa, eta umeentzako dantzaldia, besteak beste. Iganderako, berriz, garbitzeko hitzordua jarri dute.
ZELABIDEKO JAIAK
HERNANI
GAUR
18:00 Txupinazoa + Holi fest. Gabriel Zelaia plazan
18:30 Jaixkipe Txaranga eta buruhaundiak.
19:30 Sardina dastaketa, Gabriel Zelaia plazan.
20:00etatik 22:00etara Umeentzako dantzaldia DJ Pakorekin eta mozorro lehiaketa, Gabriel Zelaia plazan.
21:00 Denok afaltzera. Bokatak egongo dira txosnan.
23:00etatik 02:00etara Helduentzako dantzaldia DJ Pakorekin eta mozorro lehiaketa. Saria egongo da irabazlearentzat.
23:30 Zezen suzkoa.