Zelabideko jaiek hartuko dute auzotako festen lekukoa, bihar eta etzi

Igandean amaitu ziren Lizeagako jaiak, baina atsedenik ez dute izango herriko auzoetako festek. Izan ere, bihar hasiko dira Zelabideko jaiak. Bi eguneko egitarauarekin, aspertzeko tarterik ez dute izango auzotarrek eta bertaratzen diren guztiek. 

Jaien lehenengo egunean, bada urtero errepikatzen den ekintza bat: Holi fest-a. Eta aurten ere, noski, kolorez jantziko da Zelabide, jaiei hasiera emateko txupinazoan. Koloretako hautsak botako dituzte airera, eta hamaika kolore hartuko dituzte herritarren jantziek. Arratsaldeko 18:00etan jarri dute horretarako hitzordua, eta segidan, Jaixkipe txarangak hartuko du lekukoa, auzotarrak txaranga doinuekin alaitzeko prest.

Bestalde, hainbat lehiaketa eta txapelketa ere izango dira aurtengoan. Besteak beste, Mus Txapelketako finala, Toka Txapelketa edota mozorro lehiaketa. Azken hori bihar izango da, eta saria dagoela aurreratu dute Sagastialde Elkartekoek.

Horrekin batera, bazkari eta afari herrikoiak ere izango dira auzoan, bi egunetan. Afariei dagokienez, txosnan bertan salgai jarriko dituzte bokatak, eta, beraz, festa girotik aldendu gabe, hantxe bertan afaldu ahal izango dute auzotarrek. Larunbateko herri bazkarian, berriz, paella izango dute menuan. Bazkariko txartelak salgai jarri zituzten joan den asteburuan, Arri eta Eper tabernetan.

Adin tarte guztientzako ekintzak aurkeztu dituzte, baina haurren jarduerek protagonismoa izango dute festetan. Izan ere, izango dira puzgarriak, apar festa, Denontzat gimnasioak antolatutako oztopo-proba, DJ Pakorekin dantzaldia, eta beste hainbeste egiteko.

Aipatutako guztiagatik, antolatzaileek bertaratzeko deia luzatu diete herritarrei, jai giroa ziurtatuta egongo da-eta!