Sekulako egunaz gozatzeko aukera izan zuten atzo, Lizeagako auzotarrek. Egun osorako egitaraua prestatu zuten, eta ekintza mordotan hartu zuten parte txikiek eta baita helduek ere. Goizean, Lizeagako txikiek hartu zuten testigua, jolasekin eta askotariko erroskila tailerrarekin. Bazkal-aurretik, buruhaundiek, auzotarren bizkarrak berotu zituzten, eta urtero moduan, omenaldia eskaini zieten adinekoei Sandiusterrin. Arratsaldean, berriz, bingoaz gain, Aerorumban gorputzak mugimenduan jartzeko parada izan zuten, besteak beste.
Jaiei amaiera, gaur
Gaur emango zaie amaiera Lizeaga auzoko jaiei, baina eguna ederki aprobetxatuko dute auzotarrek. Izan ere, goizean tortila lehiaketa egingo da, eta 12:30ak aldera, sagardoa dastatzeko aukera izango dute herritarrek, trikitixaren laguntzaz. Jarraian, toka eta bote txapelketak hartuko du nagusitasuna, eta arratsaldeko mus txapelketa antolatu da, Lizeagan. Gaueko 20:00etan amaituko dira Lizeaga auzoko jaiak.
LIZEAGAKO JAIAK
GAUR
11:30 Tortilak eramateko ordu muga (Tortila lehiaketarako).
12:30 Sagardo dastaketa eta trikitixa. Jarraian bola eta toka txapelketa.
16:00 Mus txapelketa, Lizeagan.
20:00 Jaien bukaera.