Bihar hasiko du bere ibilbidea Nerea Ibarzabalek, aurtengo Bertsolari Txapelketa Nagusian. Hernanin bizi den markina-xemeindarrak kanporaketa jokatuko du Zuberoan, Gotaine-Irabarnen, arratsaldeko 17:00etan hasita. Honako bostak izango ditu bertsokide: Ane Labaka, Eneko Lazkoz, Julio Soto, Oihana Iguaran eta Patxi Iriart. Gai-jartzaile lanetan, berriz, Aritz Bidegain ariko da.
Kanporaketa gogorra izango da biharkoa, eta irabazlea bakarrik sailkatuko da zuzenean finalaurrekoetara. Gainerakoek, puntuazioen araberako sailkapenean bilatu beharko dute pasea: sei kanporaketen irabazleez gain, 13 puntuazio onena dutenek egingo dute aurrera, eta 17 bertsolari geratuko dira kanpoan.
Biharko saiorako sarrerak, Gotaine-Irabarnen bertan egongo dira eskuragarri, Herriko Gelan, 15:00etatik aurrera. Internet bidez ere eskuratu daitezke, bertsosarrerak.eus webgunean, bihar eguerdiko 12:00ak arte. Sarrera arrunta 12 euro dira, 6-18 urte bitarteko gazteentzat 6 euro, eta Bertsozale Elkarteko bazkideentzat 10 euro. Bertso saiorako, arratsaldeko 16:00etan irekiko dituzte aretoko ateak, eta sarrerak ez dira zenbakituak izango.